Psalms 91
Kaem nu nanga Bitua Kari Yawara ko den
1Awiriya Kaem Biya koma dugu te pempem bagoso,mu Kaem Sokel Karogo mu nu ko sinar tauk se
nu lila te yawarakala bagurukko.
2Mu kari mutang Kaem iwita manukko,
Ni aninga Lakira Kari, se aga Bitua Kari.
Ni aninga Kaem, ani ni ko ko angamang ningi nunguning.”
3Ni kari uwuta mu Kaem ninguru ka sinar taukko,
se mel memek ni me ko ikisam mu me ka morukko,
ale kuera memek me kimik te tairukko.
4Nu tarak ko gotek ereso iwitata, ka ira murok se
ni ko luman bowa ningi yawarakala bagerko.
Nu me ka bitirukko, am ka ira murok ale ka sinar taukko.
5Se ni mel memek turom ka maguwurokko tairuk mu ko me nguangerko.
Ale gatu woremkalal ka morukko tairuk mu ko betela me nguangerko.
6Ni kuera memek turom ka maguwurokko tairuk mu me ko nguangerko,
woremkalal tairuk mu betela me ko nguangerko.
7Se wan tausen ni beta dugu te dagulomon kuemon,
se ten tausen kiting sengam mu te dagulomon kuemon,
bare ni mu memek me toko.
8Kari memek alo koma memek tamonko, se ni mu am motam la nungarkiwerkowo.
9Ni aninga Bitua Kari Kaem koma dugu te ilak bager,
10mu ni memek bo me arikko,
se tere daong kari ka kawam duap te me taimonko.
11Mu awuk, Kaem ko ensel alo nunga manuk se nika namara taira mu te ka bitaru se bagomonko.
12Se manga te ka siwik atumko neger, mu nuguting te ka ilu gurugumon se manga te siwik me atumko.
13Ni siwik te layen ma urer nunga irako,
layen sokel ago se ma urer bibiya karogo la nunga irakowo.
14Kaem iwita balso, “Ani kariimet aninga kuesan mu nunga sangaru taikko,
ale kariimet aninga aip patowasan mu nunga sinar taikko.
15Se nuna aninga arumon, mu ani nuguring iluwekko,
nuna memek ningi kapomon, mu ani arungak bagirikko,
ale nunga bataguru taik ale nup biya nungarikkowo.
16Ale balik se kam maiya biya ali imi te bagomonko,
ale nunga giek se agarak yawarakala bagomonkowo.”
Copyright information for
WSK